Bróderskæri
Er að fara í Vogue að kaupa bróderskæri með mömmu og ömmu. Vildi bara að þið vissuð það.

Takk fyrir mig
Ég er búin að borða góðan mat og fá góðar gjafir. Eftirfarandi hluti fannst fólki réttast að gauka að mér: Grillpönnu (sem ekki þarf að nota olíu á....voða megrandi), Don Kíkóta, Lovestar (sem ég er byrjuð á og líkar vel), sokka, nærföt(frá ömmu auðvitað), herðatré, steikarfat, ryksugu, geisladisk, kristalskál (!), pening og kertastjaka. Að lokum má nefna straujárn sem Guðni gaf mér. Ég er að fara að flytja að heiman og straujárn fylgja ekki íbúðum. ERGO=mig vantar straujárn. En fólk er svo fast í staðalmyndum að ég hitti varla þá konu sem verður ekki hálf móðguð fyrir mína hönd yfir því að fá straujárn. Halda að með því sé Guðni eitthvað að hlekkja mig við strauborðið. (Og þetta eru einmitt konurnar sem þvo og strauja af mönnunum sínum!) Ég er hinsvegar hæstánægð og sem nútímakonu get ég þegið straujárn frá manni mínum án þess að líta á það sem einhverja sneið til mín. Svo gaf Guðni mér líka demantshálsmen! Hahhah.

Gleðileg jól, kæru vinir, vandamenn og aðrir lesendur bloggsins!

Jibbý
Þá er ég búin í prófunum og get farið að undirbúa jólin. Ekki langur tími til þess. Í gær fór ég á jólahlaðborð með vinum úr grunnskóla og var það afar skemmtilegt að venju. Þó voru óvæntar uppákomur eins og ný kærasta sem enginn vissi af (skemmtilegt!!) og frekar nýr kærasti sem var einum of drukkinn :( Í morgun fór ég svo í messu þar sem litlu krakkarnir voru með helgileik. Þau voru svo sæt að ég var með tárin í augunum allan tímann. María var stjarna leiksins og fæðingin gekk vel fyrir sig. Jesúbarnið var leikið af babyborn dúkku og grét því ekki neitt.