Bryndís bloggar

Elskulega diddan mín er komin í sex vikna afvötnun á Vog. Nei djók, þurfti bara að krydda færsluna aðeins. Hún er í Halifax að rannsaka veirur. (Eins og það sé eitthvað skárra en að vera í meðferð :) Bryndís bloggar því í fyrsta sinn til að leyfa okkur að fylgjast með ævintýrum sínum í Kanada. Það er gaman, en við munum sakna hennar mjög. Hún er með lítinn kúlubúa með sér sem verður örugglega orðinn alveg risa þegar við sjáum þau næst. Kíkið á kelluna!

Plástrar og kynjafræði

Við vorum í stórmarkaði. Sé ég þá teiknimyndaplástra og ákveð að kaupa pakka. (Ég er ginkeypti fyrir markaðssetningargimmikum.) Nokkrar tegundir voru í boði. Scooby Doo, sem mér hefur alltaf fundist leiðinlegur og vitlaus. Risaeðlur, sem eru sóóó 90's. Og svo Power Puff stelpurnar. Vel þann síðastnefnda af því mér finnst Power puff-in töff. Sterkar, hressar og sigra alltaf vonda gæjann. Heyrist þá ekki í kallinum. "Ætlarðu að kaupa ÞETTA fyrir Nóa?" Honum fannst semsagt ekki alveg ganga að snáðinn væri með stelpur á enninu. Ég staldraði við eitt andartak og fann að hluti af mér brást eins við. En hvernig er þessi heimur eiginlega búin að ala mig upp? Ég þykist feministi, jafnréttissinni og vil vera hrikalega meðvituð. Samt hikaði ég! En svo skvetti ég ímyndaðri vatnsgusu á afturhaldssemina og keypti plástrana. Skellti svo einum á ennið á Nóa strax í búðinni bara svona til að ögra Guðna. Fer svo væntanlega í bókabúð á næstunni og kaupi alla Línu langsokk ;)